يوميات بنكهة مختلفَة ..

+ سأتحدث كطفلة صغيرة , فرحت كثيراً ذات يوم وسطرت فرحها للزمن , منذ زمن بعيد لم اكتب يومياتي بهذا الشكل

ويوم كهذا اشتهي كتابة كل تفاصيله , يوم كهذا احبّه !

رح اتكلم بلهجتي :) ,

اللهم لك الحمد حتى ترضى وبعد الرضى وإذا رضيت اللهم لك الحمد والشكر

وحققت حلم ثاني من احلامي قبل العشرين ^__^

حلم احب اتذكر تفاصيله وكيف كتبته في مصلى الجامعة ونسيييته

وما اتذكرته ثاني غير لمن بدأ يتحقق , يومها رجعت للورقة ولقيت احلام كثيرة من اللي كتبتها اتحققت !

حلمي رغم انه ممكن يكون بسيط لكن لمن كتبته ماكان في بالي أي موضوع او أي طريقة لتحقيقه

حلمي " ألقي محاضرة قبل الـ 20 " , وأنا اكتبه فكرت كيف ممكن القي محاضرة ؟ وفين رح تكون ؟ وبصفتي ايه ؟

اسئلة كثيرة مالقيتلها اجابات بس دعيت بصدق إني احقق هذا الحلم

بعدها بفترة اتحقق واحد من أحلامي قبل الـ 20 " أكون في نادي قراءة " , وفرحة هذا الحلم ماتنوصف , فعلاً

احساسي بحلمي كان من اجمل الأحاسيس بحياتي ..

من اول مامسكنا النادي وإحنا نخطط لفعالياته خلال هذا الترم

قالتلنا مشرفة النادي " فاطمة الحارثي " الأفضل نسوي محاضرات .. رجعت البيت أفكر بعناوين محاضرات

وحسيت الأغلب مكرر وأغلب الدورات والمحاضرات اللي انا حضرتها اتكررت كثير وصارت تقليدية مرة

رجعنا اليوم الثاني والحمدلله عجبتهم كل العناوين المقترحة لمحاضرات ممكن القيها .. ورسي الإختيار على محاضرة عن التأليف

في وقتها ماشلت هم المحاضرة كنت خايفة كثير من الأمسية الثقافية اللي بعد كم اسبوع , خصوصاً انه ماما رح تكون موجودة

وأنا دايماً جريئة قدام كل الناس إلا ماما , لها هيبة من نوع ثاني هيبة احس صعب اتجرأ قدامها ..

والحمدلله , طلعت الأمسية جميلة وأحلى مما اتمنينا والفضل يعود لله ثم لجهود كثيرة من المشرفات ..

خلال الأمسية كسرت حاجز الخوف من الإلقاء أو الوقوف قدام أكثر من شخص كلهم يطلوا فيا ههه

في البداية ارتجفت يدي وارتجف صوتي بس الحمدلله اتعودت بسرعة ع الجو واندمجت ونسيت الرجفة هههه , كان في شي مو عاجبني يومها

رغم ثناء الجميع , ماكنت حابة أمسك اوراق .. صح اني كنت ارفع راسي كثير للناس ومقطع من العرض ومقطع من الورقة :)

لكن برضو المفروض مافي اوراق ... واللي يخليني ما احس بالتقصير اننا كنا مشغولين فعلاً و ماخلصنا مواضعينا إلا ليلة الأمسية وكانت كثييرة

والكلام اللي فيها كثيير :) .. الأمسية في البداية خلتني اتجرأ حتى مع البنات بعد كذا وادير نقاشاتنا براحة

المحااضرة .. أنا دايماً مشغوولة .. مدري ليش !

فعلاً ما الاقي وقت اسوي شي .. كنا محددين الموعد من فترة طويلة .. ولمن قرب فكرت الغيها !

قلت لماما ماحضرت شي وماعمري القيت محاضرة طويلة وكلها عليّا < باين ادلّع وابغى احد يشجعني هههه

قالتلي اكتبيها وشوفي .. رحت ماكتبتها سويت اعلانها ورسلته للبنات , علشان حتى إذا اترددت ما أقدر الغيها واضطر اجهزها هههه

الإعلان طلع شكله مرا حلو , حبيته كثير .. ( تسلم دياتي هههه ) والحمدلله كل اللي شافوه حمسووني اكثر للمحاضرة

لمن أدخل الفيس بوك والاقي الناس تتمنالي الخير بعضهم اعرفهم والغالب مااعرفهم , يالله شعور مررا حلوو ومريح ومحفز

لمن دخلت منتدى الجامعة انبسطت مرا على تعليقات الناس على الإعلان , اخويا في الفيس بوك وتشجيعه ونشره لإعلاني اكثر

الحمدلله كل صدى كان بالنسبالي يد ساعدتني علشان اكمل طريقي بنجاح .. ممتنة مرا كثييييير

طبعاً لمن سويت الأعلان وأنرسل وبدأوا الناس يسجلو صرت اجهز للمحاضرة , كان قبل الموعد بأسبوعين وشوية

صرت اقرأ كتب في التأليف , وقبلها سمعت محاضرات + كتب في الإلقاء وراجعت محتويات دورة اخذتها قبل كدا في الإلقاء

واقتنعت اني لازم اقرأ واقرأ واقرأ , وأكتب بس نقاط رئيسية في العرض يصير اتفلسف على كل نقطه من قراءاتي في الموضوع ههه

, ماحفظت ولا شي .. اصلاً مدري كيف ممكن احفظ !

حتى الإقتباسات قلت احفظها ع الأقل , في الاخير اضفتها للعرض .. والباقي خليته حكاوي علشان اخذ راحتي هههه

كنت كل يوم تقريباً اقرأ شي .. واتذكر شي في نفس الموضوع ,ابحث عنه , تمر ايام ماأقرأ شي واقعد اقول في نفسي رح يطلع على راسك إذا وقفتي قدام الناس وماعرفتي تتكلمي

وارجع اقرا وابحث ..

كنت مرة خايفة من اني اوقف قدام ناس جايين مخصوص علشان يسمعوني .. لازم أكون استاهل الإنصات بكل طريقة !

طبعاً كل كتب ومحاضرات الألقاء تنصح بالتدريب والتدريب والتدريب ..

كنت ناوية أدرب كثير بس انشغلنا ومافضيت إلا يوم الأربعاء اللي قبل المحاضرة , كلمت شروق المباركي ( مشرفة معايا ) ورحنا النادي

كنت أبغى ادرب في نفس القاعة ومع العرض لكن للأسف جهاز العرض ما اشتغل وصاروا الناس يحاولوا يشغلوه وانا وشروق نتكلم ههه

بعدين قالتلي السكرتيرة انتي اش اهم عندك تتدربي ولا تشوفي الجهاز ؟! نبهتني اني جاية علشان اتدرب هههه

تركتهم يحاولوا فيه وقعدت ادرب مع شروق , طبعاً كنت قاعدة وفاتحة كتب قدامي واقلها رح اقول كدا وكدا وكدا احيانا اندمج

واقعد اتفلسف على راسها وتصفقلي هههه

بعدين قالتلي ماتبغي توقفي ؟

هناا انا كنت محتااارة بقوة , كيف اوقف ؟ وفين اودي يدي ؟! ( دايما احس اليد عضو صعب التحكم فيه خلال الإلقاء والرقص هههه )

وقفت قدامها بعدين قلتلها بلا هبل ما اعرف كدا .. احس اننا نلعب على بعض هههه

قعدت مع شروق ساعة إلا ربع بس في الجزا الأول ( المحاضرة 7 اجزاء )

ووقفنا لأنه اتأخر الوقت وقالتلي شروق تعالي السبت نكمل

رحت لماما وقلتلها ماخلصنا شي , ابغى اروح السبت اتدرب .. قالتلي ماله داعي دايماً أول مرة احسن مرة < فديت نصايح ماما اللي تراعي كسلي هههه

مارحت , ويوم الأربعاء وتشجيع شروق ودعمها كان كافي ,

ولأني كل شوية اقول عنديي وقتت .. ماخلصت العرض تماماً إلا يوم الأحد .. الصباح ضفت السير الذاتية للمؤلفات

وكان عندي الصباح في الجامعة تسليم رسمات يوم السبت .. شَفيتَها وقلت للدكتورة أول وأخر مرة وسامحتني وقالتلي ربي يوفقك خخخ

رجعت البيت الأحد نعسانة + قلقانة + ماخلصت العرض + لازم أقوم بدري واروح النادي بدري

نمت وصحيت على الساعة 4 .. كملت العرض وشيكت عليه وراجعته وحطيت نسخة منه ع الفلاش .. وجهزت اغراضي

ولبست ويادوب طلعت ع الساعة 6 , مرينا ع السوبر ماركت ماما الله يخليها كانت موصيتلي ع اغراض بس اخذتها ..

ورحت الناادي .. أول كلمة قلتها للسكرتيرة ( اشتغل جهاز العرض ) لأني رح اروح وطي إذا مااشتغل ههههه مني كاتبة ولااشي

مااشتغل بس جابوا جهاز ثاني , الجهاز الأول معاه ريموت كنت مفكرة امسك الريموت لمن مااعرف اش اسوي في يدي هههه هذا ما معاه

لحد اذان المغرب كان بس في بنتين , بعد المغرب بدأوا البنات يجوا

وجات شروق , وقعدت تجرب المايك يشتغل ولا لأ , وانا كنت معترضة ماابغاااه و مااحب المايك يطلع الصوت موطبيعي

وشروق مصرة تقلي صوتك واطي ومو راضية تقتنع اني اعرف اعليه خخخخخ

سكت على مضض وقلت في نفسي خليها تشغله احتياط , والحمممدلله مارضي يشتغل ولا مايك يومها واقتنعت اني اعرف اعلي صوتي هههه

كانت المحاضرة في الدور الثاني , ومقر نادي القراءة في الدور الأول وكنت طالعة نازلة

في احدى ى ى المرات وانا نازلة كان قدامي في الصالة اللي تحت بنات كثير قاعدين يسجلوا عند السكرتيرة وشروق واقفة على أول الدرج تطل فيا وتقلي ليش نازلة

وأنا ( دربججج ) ههههههه في درجة ماشفتها لأني كنت اطل في شروق وطحت على ركبتي قمت اضحك علشان مااتفشل وانا ميتة وجع ههه

واطل في الصندل وادعي مايكون انقطع ورطة بس ضريبة التشيك , الحمدلله ماانقطع ههههه

فشششلة , من أول اقول في نفسي الإنطباع الأول مهم الإنطباع الأول مهم , وانطباعي الأول طيحة ع الدرج هههه

بعدها رحت قعدت بأدبي في صالة الدور الثاني اقرأ في كتاب معايا لحد ماصار العدد كويس

بدأنا ع الساعة 8

حضروا 17 من أصل 21 بنت سجلت اسمها ..

بالإضافة للمؤلفات ومديرة النادي وشروق ..

في البداية اشششش اقول ,, رحبت فيهم , عرفت بالنادي , بالمؤلفات , وبدأت ..

الحمدلله , دخلت في جو المحاضرة بسرعة وماارتجفت ولا احترت في يدي هههه

طبعاً ماقدرت امشي بس كنت احرك يدي لأنه مافي ريموت ولازم اكون عند الاب توب ,, يعني امشي خطوتين وارجع , اريح برضو هههه

وأنا اتكلم اشوف تعبيرات الوجوه واقول في نفسي ( منجد مندمجين معايا ! ) اشوف الناس تكتب الكلام اللي اقوله ( ياحركاتي قاعدة اقول شي مهم هههه )

مع اني بدأت 8 بس على 8 ونص كنت واصلة للجزا الثالث من المحاضرة ! هههه اتكلم بسرعة كأنه احد ورايا

اخذنا بريك , وخلال الإستراحة حرصت اسأل المقربين اش انطباعهم ورأيهم وملاحظاتهم

والحمدلله كل الإنطباعات كانت حلوة ومشجعة ومرضييية .. بس الكل علق على سرعتي في الكلام هههه

انا اشوف اني اسرع ولا اقعد اقول آآآ خخخخ

وخلال البريك كان فيه بنت متأخرة عدتلها الأشياء اللي مالحقتها

ورجعنا كملنا الجزا الرابع والخامس وعلى 9 وربع كنا مخلصين :)

نزلوا البنات نادينا لحد ماجات سياراتهم

طبعاً رجعت البيت اتصل اخويا يقلي كم بنت جات من الفيس بوك ؟ هههه

كان لازم احطها في التقييم من فين عرفوا عن المحاضرة :)

تااني يوم , كان عندي أوف في الجامعة وقعدت اعدل في العرض واضفت عليه

لأني من اول كنت حاطة في بالي انه مقسم جزأيين واني رح اشتغل ع الجزا الثاني يوم الأوف

كان باقي كتابة المسودة والمراجعة والنشر , وساعة للمؤلفات :)

نمت متاخر لأني قعدت اسوي أوراق التقييم وطبعتها الليل

وماصحيت غير على عشرة الصباح وبدأت اعدل ع العرض واقرا في الموضوع اكثر

مدري ليش انا احوس في الأشياء مرة :( ..

ماقفلت الاب توب إلا بعد 5 , وكان المفروض 5 ونص اطلع من البيت وكنت رايحة مع صقيقتي الأغلى لجون

اتصلت عليها قلتلها خليها 6 , بعدين رجعت اتصلت عليها قلتلها خليها 6 وربع , اخذت شور وطلعت قلتلها خليها 6 ونص

الله يصبر الناس على حوستي هههه ..

رحنا النادي وزي اليوم اللي قبله اغلب البنات جوا بعد المغرب

وجات شروق الخالد اللي اعتذرت في اليوم الأول , وشفت شروق :)

حبوبه وعفوية مرة , عجبتني زي ماعجبتها ههههه

وجات اماني السيد اللي اعتذرت برضو اليوم الأول , وكانت جدا رائعة كالعادة :)

اماني السيد تصير بنت عمتو واعرفها من زمااان ههه

وبشاير الحربي جات معاها امها اليوم الثاني ونورتنا بوجودها

اليوم الثاني مدري ليش صارت يدي ترجف في البداية قبل ما ابدأ

وخفت :( .. بس الحمدلله مشي الحال بعد مابدانا ^___^

كان حلو مرة الحمدلله , وأحلى شي فقرة المؤلفات وحكاياتهم مع النشر

مررة انبسطت فيهم / معاهم , واستفدت جداً

كل الكلام اللي قلناه كان نظري .. معاهم شفنا كيف ممكن تكون البدايات

وكيف ممكن نتغلب عليها ونستمر لو كانت متعبة ..

طبعاً مااقدر اوصف جمالهم يومها كانت أماني رائعة ومميزة , شروق عفوية مرحةوحبووبة , بشاير جميلة رقيقة وواثقة ..

حسييت بالإمتنان مرة لهم ,, اختصروا علينا مشوار طوييل من الاسئلة والاستفسارات عن النشر

كان في هدايا بسيطة من النادي للمؤلفات , وفي اخر اللحظات ماعرفت اش اقول

كنت مبسوطة مرة اني حققت حلم مبسوطة مرة بإبتسامات البنات قدامي ووجودهم , مبسوطة بالمؤلفات بالصديقات

شكرتهم , وحكيتهم حكاية حلمي البسيطة مرة :) .. وخلصنا

بعد ماخلصنا وودعنا المؤلفات رجعت طلعت الدور الثاني الم عفشي ^__^

وكنت تعبااانة قعدت على اقرب كرسي , شوية جات شروق ورايا دخلت القاعة وقالتلي تعرفي تغطرفي ؟!

أنا : نعم !!!!!

شروق : نعرفي تغطرفي ؟؟

أنا : ليييش ؟؟

شروق : بس تعرفي ؟؟

أنا اقول في نفسي محتاجين مغطرفة في البازار بعد بكرة ؟! ولا تبغى تتعلم شروق فجأة فن الغطرفة ؟! ههههههه

: ايوة أعرف

: طيب غطررفييي

: هييي , منجدك !!!!!

: يلااا

: ماابغى ى ى

: يلاااا

: طيب قفلي الباب لا يطلعولنا اللي تحت ههههه

ردت شروق الباب وانا زي الاطرش في الزفة هههه

: لولووووليييي << قطعتها في الربع من الضحك هههههه

شروق بإبتسامة عريضة ههه: مرة مبسوطة فيكِ ونفسي اغطرفلك بس مااعرف , كنت رووعة

وانا منجد مااعرف اعبر في لحظات كدا , حضنتها :)

وطلعوا الناس اللي تحت مندهشين السكرتيرة ولجين ههههه وشاركونا ههه

الحمدلله .. كاان يووم حلووو

الله لايحرمني من لذة تحقيق الأحلام :) ولايحرم احد منها :)

انبسطت على انطباع ورأي وتشجيع البنات ليا بعد المحاضرة في النادي او الفيس بوك او الجوال :):)

يالله لو تعرفوا قد ايش انا ممتنة لكم (f)

هنا تقرير المحاضرة الرسمي :)

http://readingclub09.blogspot.com/2010/05/blog-post.html